སྔོན་མ་ཤིང་ནགས་ཧ་ཅང་ཆེན་པོ་ཞིག་ཡོད་པ་རེད། དེའི་ནང་དུ་རི་དྭགས་མང་པོ་འཚོ་སྡོད་བྱེད་ཀྱི་ཡོད་པ་དང་དེ་དག་གི་དཔོན་པོ་ནི་ཝ་མོ་གཅིག་ཡིན། ཉིན་གཅིག་ཝ་མོ་དེ་ལ་ན་ཚ་ལྗིད་པོ་གཅིག་ཕོག་ནས་ཤི་ལ་ཁད་ཡོད་དུས། ཝ་མོས་མོ་རང་མ་ཤི་གོང་ལ་མོ་རང་གི་ཝ་ཕྲུག་གཉིས་ལས་གཅིག་སེམས་ཅན་དེ་ཚོའི་དཔོན་པོར་གདམ་དགོས་བསམ་སྟེ་ཝ་མོས་ཕྲུ་གུ་གཉིས་ལ་བཤད་པར། ང་ནི་ན་ནས་ཤི་གྲབས་འདུག སོང་ཙང་། ཁྱེད་གཉིས་ནས་གཅིག་ངའི་ཚབ་ཏུ་དཔོན་པོ་བྱེད་དགོས་ཀྱི་རེད། ཡིན་ན་ཡང་དཔོན་པོ་མ་གདམ་གོང་ལ་ཁྱེད་གཉིས་ཀྱིས་ང་ལ་ལས་ཀ་གཅིག་བྱེད་དགོས་ཀྱི་རེད། ང་ཤི་ཁར་ཁ་ལག་ཞིམ་པོ་ཞིག་ཟ་འདོད་འདུག ཁྱེད་གཉིས་ལས་སུས་ཁ་ལག་ཞིམ་པོ་ཁུར་ཡོང་ཐུབ་ན་དེ་ནི་ངའི་ཚབ་ཏུ་དཔོན་པོར་བསྐོ་བཞག་བྱེད་ཀྱི་ཡིན་ཞེས་ལབ་པ་རེད། དེ་ནས་ཝ་ཕྲུག་གཉིས་ཀྱིས་ཁ་ལག་བཙལ་ནས་དཀའ་ལས་ཧ་ཅང་མང་པོ་བརྒྱབ་ཀྱང་ཁ་ལག་ཡག་པོ་ཞིག་རག་མ་ཐུབ། དེར་རྟེན་ཝ་ཕྲུག་ཆུང་བ་དེས་ཤིང་ནགས་ནས་ཤིང་སྡོང་གི་ལོ་མ་ཁ་ཤས་ཁུར་ནས་ནང་དུ་ལོག་པ་རེད། ཕྲུ་གུ་ཆེ་བ་དེས་དཔོན་པོ་བྱེད་རྒྱུར་འདོད་རྔམས་ཀྱིས་སེམས་ཅན་གཞན་པའི་ཁ་ལག་བརྐུས་ནས་ནང་ལ་ཁུར་བ་རེད། ཡིན་ན་ཡང་ཝ་མོས་ཕྲུ་གུ་ཆེ་བའི་ཁ་ལག་བརྐུས་ཟས་ཡིན་པ་ཤེས་ཏེ་གཞུང་དྲང་གི་ཕྲུ་གུ་ཆུང་བ་དེ་དཔོན་པོར་བསྐོས་པ་རེད།།
བསྟན་འཛིན་རྣམ་གྲོལ། ཨོ་སུ་ཏན་ཏེ། འཛིན་གྲྭ་དྲུག་པ།