ཕྱི་ཟླ་༡༠་པའི་ཚེས་༩ཉིན། བྷེལ་ཇམ་བོད་ཀྱི་ཆོས་རིག་འཛིན་སྐྱོང་ཁང་གིས་གདན་འདྲེན་སྙན་གསེང་སྔ་རྗེས་རིམ་པར་ཞུས་བ་བཞིན། རང་གཞུང་དཔལ་ལྡན་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་ཆོས་རིག་འཛིན་སྐྱོང་ཁང་གི་ཁྱབ་ཁོངས་འཇམ་དབྱངས་བློ་འཕེལ་སློབ་གྲྭར་འཚམས་གཟིགས་གནང་རྒྱུ་སྙན་གསོན་དོན་སྨིན་བྱུང་བ་ལྟར། ཚེས་༩ ཉིན་གྱི་ཕྱི་དྲོ་ཆོས་རིག་འཛིན་སྐྱོང་ཁང་གི་སྤྱི་ཁྱབ་འགན་འཛིན་འཇིགས་མེད་ལགས་དང་སློབ་སྟོན་པ་རྒན་ལྷག་པ་ཚེ་རིང་གཉིས་གཙོས་ལས་བྱེད་ཁག་ཅིག་སྦུ་རུ་སལ་མེ་འཁོར་འབབ་ཚིགས་སུ་ཆེད་བཅར་གྱིས་བཀའ་བློན་མཆོག་ཕེབས་བསུ་གནང་བ་དང་།
བཀའ་བློན་མཆོག་དང་སྦར་སིལ་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས། དྲུང་ཆེ་འཕྲིན་ལས་དབང་འདུས་ལགས་བཅས་གདན་འདྲེན་ཞུ་ཡུལ་ཚོགས་ཁང་སྒོ་ཆེན་མདུན་དུ་འབྱོར་འཚམས་སྤྱི་ཁྱབ་འགན་འཛིན་གཞོན་པ་རྡོ་རྗེ་སྐྱབས་གཙོས་ས་གནས་ཁག་གི་འགན་འཛིན་དང་དགེ་སློབ། ཕ་མ་ཚོས་མཇལ་དར་བཟུང་སྟེ་སྤྲོ་སེམས་འཁོལ་བའི་ངང་དགའ་བསུའི་སྣེ་ལེན་དང་བཀྲ་ཤིས་གཤོག་པའི་བྲོ་ཡིས་མདུན་བསུས་ཏེ་བཀའ་བློན་མཆོག་ཚོགས་ཁང་དུ་གདན་འདྲེན་ཞུས། ཚོགས་ཁང་ནང་སྒོའི་འགྲམ་དུ་འཇམ་དབྱངས་བློ་འཕེལ་སློབ་གྲྭ་ས་གནས་ཁག་དྲུག་གི་ངོ་སྤྲོད་པར་རིས་དང་ཀློག་དེབ། ནང་སྦྱོང་། ཚགས་པར་སྐོར་བཅས་བཤམས་ཡོད་པ་ཤེས་ཡོན་འགན་འཛིན་བཀྲ་ཤིས་བདེ་ལེགས་ཀྱིས་བཀའ་བློན་མཆོག་ལ་མཚམས་སྦྱོར་ངོ་སྤྲོད་གནང་། བཀའ་བློན་མཆོག་ཕེབས་བསུའི་མཛད་སྒོའི་སྟེང་བྷེལ་ཇམ་བོད་རིགས་ཚོགས་པ་གཙོས་ཚོགས་སྐྱིད་ཁག་གི་སྐུ་ཚབ་རྣམས་ཕེབས་ཡོད་པ་དང་། ཆོས་རིག་འཛིན་སྐྱོང་ཁང་གི་དྲུང་ཆེ་བསོད་ནམས་ཉི་མ་ལགས་ནས་མཛད་སྒོ་གཙོ་སྐྱོང་དང་དབུ་འཛུགས་གནང་བ་ལྟར། མཛད་སྒོའི་ཐོག་མར་བོད་རྒྱལ་ཁབ་ཆེན་པོའི་རྒྱལ་གླུ་གྱེར་བ་དང་། དེ་ནས་སྦུ་རུ་སལ་ས་གནས་འཇམ་དབྱངས་བློ་འཕེལ་སློབ་གྲྭའི་ཟློས་གར་དགེ་རྒན་ངག་བདེ་ཆེན་གྱིས་གསུང་གཞས་ཕུལ་བ་དང་སློབ་ཕྲུག་ཚོས་རིག་གཞུང་འཁྲབ་སྟོན་ཁག་ཅིག་གཟིགས་འབུལ་ཞུས། དཔལ་ལྡན་ཤེས་རིག་བཀའ་བློན་མཆོག་ནས་འཇམ་དབྱང་བློ་འཕེལ་སློབ་གྲྭ་ས་གནས་ཁག་དྲུག་གི་འཛིན་རིམ་སོ་སོའི་ཡིག་རྒྱུགས་ཨང་རིམ་རྩེ་ཕུད་ཀྱི་སློབ་མ་ཡོངས་ལ་གཟེངས་བསྟོད་བྱ་དགའ་བསྩལ། ཤེས་ཡོན་འགན་འཛིན་བཀྲ་ཤིས་བདེ་ལེགས་ཀྱིས་བྷེལ་ཇམ་བོད་ཀྱི་ཆོས་རིག་འཛིན་སྐྱོང་ཁང་༢༠༠༨ ལོ་ཐོག་མར་དབུ་བརྙེས་རྗེས་བོད་ཀྱི་སྐད་དང་རིག་གཞུང་མི་ཉམས་རྒྱུད་འཛིན་ཆེད་བྷེལ་ཇམ་ས་གནས་ཁག་དྲུག་ཏུ་གཟའ་མཇུག་བོད་ཡིག་སློབ་གྲྭ་ཁག་རིམ་གྱིས་གསར་འཛུགས་བསྐྱངས་བའི་བརྒྱུད་རིམ་ངོ་སྤྲོད་དང་།
༢༠༡༣ལོ་ནས་བཟུང་ཤེས་རིག་ལས་ཁུངས་ཀྱི་ཆོག་མཆན་བཀའ་འཁྲོལ་ཐོབ་པ་གཞིར་བཟུང་ཤེས་རིག་གིས་རྩོམ་སྒྲིག་གནང་བའི་སློབ་དེབ་བེད་སྤྱོད་གཏོང་མགོ་བཙུགས་ནའང་མ་འོངས་བར་སློབ་དེབ་འདི་བཞིན་མུ་མཐུད་བེད་སྤྱོད་གཏོང་རྒྱུ་དཀའ་ངལ་འཕྲད་སྲིད་པའི་རྒྱུ་རྐྱེན་ངོ་སྤྲོད་དང་། ཤེས་རིག་ལས་ཁུངས་ཀྱི་ངོས་ནས་འདི་གའི་དགེ་རྒན་ཚོར་དྲ་ཐོག་ནས་ཟབ་སྦྱོང་སྤྲད་པར་ཕན་ཐོགས་བྱུང་བ་དང་མ་འོངས་བར་མུ་མཐུད་དགེ་རྒན་ཟབ་སྦྱོང་སྤྲོད་ཐུབ་པའི་རེ་སྐུལ་ཞུས། ད་ལྟའི་ཆར་བྷེལ་ཇམ་ས་གནས་ཁག་དྲུག་གི་འཇམ་དབྱངས་བློ་འཕེལ་སློབ་གྲྭ་རུ་སློབ་ཕྲུག་གྲངས་༤༠༦ དང་དགེ་རྒན་༥༧ ཡོད་པ་སོགས་མཛད་སྒོ་དང་འབྲེལ་བའི་ངོ་སྤྲོད་གཏམ་བཤད་གནང་། དེའི་རྗེས་ཤེས་རིག་བཀའ་བློན་མཆོག་གིས་རྒྱལ་ཁབ་ཞིག་གི་རྨང་གཞིའི་འཛུགས་སྐྲུན་ཐད་ཤེས་ཡོན་སློབ་གསོ་ནི་གལ་ཆེ་ཤོས་ཡིན་ལ། ཤེས་ཡོན་དང་བཟང་སྤྱོད་ལྡན་པའི་མི་རབས་ཤིག་གསོ་སྐྱོང་གནང་བར་དགེ་རྒན་ཚོར་འགན་འཁྲི་ཆེན་པོ་ཡོད་པ་དང་། བོད་པས་བོད་སྐད་མ་བཤད་ན་སུས་བཤད། བོད་པའི་བོད་ཡིག་མ་སྤྱོད་ན་སུས་སྤྱོད་ཟེར་བ་ལྟར་ཕ་མ་ཚོས་ཁྱིམ་ཚང་ནང་བྱིས་པར་བོད་སྐད་བཤད་དགོས་བ་གལ་ཆེན་ཡིན་པ། རྒྱ་གར་ནང་བོད་ཡིག་སློབ་གྲྭ་གྲངས་༧༠་ཡོད་པ་དང་། ཨ་རི་དང་ཡོ་རོབ་གཙོས་ཕྱི་རྒྱལ་ཡུལ་གྲུ་ཁག་ཏུ་བོད་ཡིག་སློབ་གྲྭ་༨༠་ཡོད་པས་ཤེས་རིག་ལས་ཁུངས་ངོས་ནས་གལ་ཆེ་གཟིགས་ཏེ་དགེ་རྒན་ཟབ་སྦྱོང་དང་གང་ཅིའི་ཐད་ནས་མཐུན་སྦྱོར་རོགས་རམ་གནང་མུས་ཡིན་པ་དང་། ༧གོང་ས་མཆོག་གི་བཀའ་དྲིན་ཉག་གཅིག་ལ་བརྟེན་ནས་མི་ལོ་དྲུག་ཅུའི་རིང་ང་ཚོའི་རིག་གཞུང་མི་ཉམས་རྒྱུད་འཛིན་གནང་ཐུབ་ཡོད་ལ། ༧གོང་ས་མཆོག་ལ་སྐྱབས་བསུ་འཆི་གསུང་བ་གཅིག་པུའི་མི་འགྲིག་པར་བོད་པ་མི་རེ་ངོ་རེ་ནས་ཁོང་གི་བཀའ་དགོངས་ལག་ལེན་བསྟར་དགོས་རྒྱུ་དེ་ཧ་ཅང་གལ་ཆེན་པོ་ཡིན་པ་དང་ཁོང་གི་བཀའ་དྲིན་ནམ་ཡང་བརྗེད་མི་ཉན་པ་རེད་ཅེས་སོགས་བླང་དོར་བཀའ་སློབ་ཟབ་མོ་བསྩལ། མཛད་སྒོའི་མཇུག་ཏུ་ཤེས་རིག་བཀའ་བློན་མཆོག་དང་དགེ་རྒན་ལྷན་རྒྱས་མཉམ་འཛོམས་སྐུ་པར་བསྒྲོན། མཛད་སྒོ་གྲོལ་རྗེས་ཤེས་རིག་བཀའ་བློན་མཆོག་བྷེལ་ཇམ་བོད་རིགས་ཚོགས་པའི་ཁྱབ་ཁོངས་ཤེས་རིག་སྣང་བྱེད་སློབ་གྲྭའི་གདན་འདྲེན་གནང་བ་ལྟར་ཆིབས་བསྒྱུར་བསྐྱངས་བ་དང་། དགོང་དྲོ་བྷེལ་ཇམ་བོད་རིགས་ཚོགས་པའི་བཀའ་བློན་མཆོག་ལ་དགའ་བསུའི་གསོལ་ཚིགས་ཕུལ་བ་ལྟར་ཆོས་རིག་འཛིན་སྐྱོང་ཁང་གི་སྤྱི་ཁྱབ་འགན་འཛིན་གཙོ་གཞོན་གཉིས་མཉམ་ཞུགས་གནང་། སྦར་སིལ་ས་གནས་འཇམ་དབྱངས་བློ་འཕེལ་སློབ་གྲྭའི་འགན་འཛིན་ལས་རོགས་ལྷ་ལུང་ཚེ་རིང་གིས་གསོལ་ཚིགས་སྦྱིན་བདག་ཆེད་ཡོ་སྒོར་༤༠༠ ཞལ་འདེབས་ཕུལ་ཡོད་འདུག ཕྱི་ཚེས་༡༡ ཉིན་གྱི་ཞོགས་པར་ཆོས་རིག་འཛིན་སྐྱོང་ཁང་གི་འགན་འཛིན་འཇིགས་མེད་ལགས་ནས་ཤེས་རིག་བཀའ་བློན་མཆོག་སྦར་སིལ་མེ་འཁོར་འབབ་ཚིགས་སུ་ཕེབས་སྐྱེལ་གནང་ཡོད་འདུག
