བོད་རྒྱལ་ལོ ༢༡༥༡ བོད་ཟླ ༨ པའི་ཚེས ༢༥དང་། ཕྱི་ལོ 2024 ཟླ 10 པའི་ཚེས་ 26 རེས་གཟའ་སྤེན་པའི་ཉིན། བྷེལ་ཇམ་བོད་ཀྱི་ཆོས་རིག་འཛིན་སྐྱོང་ཁང་དབུ་བརྙེས་ནས་ལོ་ངོ་བཅུ་དྲུག་འཁོར་བའི་༼མ་ཕམ་གཡུ་མཚོའི་རླབས་སྒྲའི་༽མཛད་སྒོའི་གདན་ཞུས་སྐུ་མགྲོན་གཙོ་བོ་དཔལ་ལྡན་རང་གཞུང་སྐུ་ངོ་དོན་གཅོད་འགན་ཁང་རིག་འཛིན་ཆོས་སྒྲོན་མཆོག་དང་དམིགས་བསལ་སྐུ་མགྲོན་ར་ཉག་དཔལ་སྤྲུལ་རིན་པོ་ཆེ་མཆོག་རྣམ་གཉིས་གཙོས་ཆོས་ཚོགས་ཁག་གི་འགན་འཛིན་རྒན་གཞོན། བྷེལ་ཇམ་བོད་རིགས་ཚོགས་པའི་ཚོགས་གཙོ་གཞོན། ཤེས་རབ་སྣང་བྱེད་སློབ་གྲྭའི་འགན་འཛིན་རྒན་གཞོན། ཚོགས་པ་ཁག་གི་ཚོགས་གཙོ་གཞོན། བྷེལ་ཇམ་བོད་ཀྱི་ཆོས་རིག་འཛིན་སྐྱོང་ཁང་གི་སློབ་སྟོན་པ་རྣམ་པ། དགེ་རྒན་རྣམ་པ། ལས་བྱེད་རྣམ་པ། སློབ་མ་རྣམ་པ། ཕ་མ་རྣམ་པ། འབྲེལ་ཡོད་རྣམ་པ་ལྷན་རྒྱས་མཉམ་ཞུགས་གནང་ཡོད་པ་དང་།
མཛད་རིམ་དངོས་གཞིའི་ཐོག་མར་ཉིན་རྒྱབ་ཆུ་ཚོད་ ༢ པའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེ་བཞུགས་ཁྲིར་གདན་འདྲེན་ཞུས་གྲུབ་བསྟུན་སྐུ་མགྲོན་གཙོ་བོ་དང་སློབ་གྲྭའི་འགན་འཛིན་རྣམ་གཉིས་ནས་མནྜལ་རྟེན་གསུམ་འདེགས་འབུལ་ཞུས། དེ་རྗེས་གཡག་སེང་དང་། བཀྲ་ཤིས་ཞོལ་པ་འཁྲབ་སྟོན། བོད་རྒྱལ་ཁབ་ཆེན་པོའི་རྒྱལ་གླུ། བོད་གཞིས་བྱེས་གཉིས་ནས་རྒྱལ་གཅེས་དཔའ་བོ་དཔའ་མོ་རྣམས་ཀྱིས་གངས་ལྗོངས་སྣོད་བཅུད་བསྟན་སྲིད་རིག་གཞུང་དང་བཅས་པའི་ཆེད་དུ་སྐུ་ལུས་མེ་སྲེག་གིས་མཚོན་ལུས་སྲོག་ལོངས་སྤྱོད་བློས་གཏོང་གནང་མཁན་རྣམས་ལ་གདུང་སེམས་མཉམ་བསྐྱེད་ཆེད་དུས་ཡུན་སྐར་མ་གཅིག་གི་རིང་ལ་ངག་བཅད་གནང། བྷེལ་ཇམ་བོད་ཀྱི་ཆོས་རིག་འཛིན་སྐྱོང་ཁང་གི་སྤྱི་ཁྱབ་འགན་འཛིན་འཇིགས་མེད་ལགས་ཀྱིས་སློབ་གྲྭའི་ལོ་འཁོར་ལས་བསྡོམས་སྙིང་བསྡུས་དང་རྩིས་ཁྲ་གསལ་བཤད་གནང་། དེ་རྗེས་སྐུ་མགྲོན་གཙོ་བོ་བྷུ་རུ་སལ་དོན་ཁང་གི་དྲུང་ཆེ་འཕྲིན་ལས་དབང་འདུས་མཆོག་ནས་བོད་ཀྱི་སྐད་ཡིག་གལ་ཆེན་ཡིན་སྐོར་དགེ་སློབ་ཕ་མ་ཡོངས་ལ་གསུང་བཤད་སྙིང་བསྡུས་གནང་སོང་། ཤེས་ཡོན་འགན་འཛིན་ལས་ཚབ་རྒན་ལྷག་པ་ཚེ་རིང་ལགས་ནས་ ༢༠༢༤ ལོའི་འཇམ་དབྱངས་བློ་འཕེལ་སློབ་གྲྭའི་ལོ་འཁོར་རྒྱུགས་སྤྲོད་སྐབས་ཀྱི་ས་གནས་ཁག་དྲུག་གི་རྒྱུགས་འབྲས་རྩེ་ཕུད་དང་པོ་དང་། གཉིས་པ། གསུམ་པ་བཅས་ལ་རྗེས་སུ་ཡི་རང་གིས་གཟེངས་བསྟོད་དང་སྐབས་གཉིས་པའི་མཐར་ཕྱིན་སློབ་མ་རྣམ་པར་བྷུ་རུ་སལ་དོན་ཁང་གི་དྲུང་ཆེ་འཕྲིན་ལས་དབང་འདུས་མཆོག་བརྒྱུད་ནས་གཟེངས་བསྟོད་འབུལ་ཡོད། དེ་བཞིན་ཤེས་བྱའི་གནས་ལུགས་གཏན་ལ་ཕབ་པའི་རྩོད་པའི་ལམ་སྲོལ་རྒྱུན་སྐྱོང་ཡོང་ཐབས་སུ་ཨན་ཐྲུ་ཝེར་པེན། བྷུ་རུ་སལ། ཨོ་སུ་ཏན་ཏེ་བཅས་ས་གནས་གསུམ་ཀྱི་འཇམ་དབྱངས་བློ་འཕེལ་སློབ་གྲྭའི་སློབ་མའི་རྟགས་བསལ་བཏང་། དེ་རྗེས་མ་ཕམ་གཡུ་མཚོའི་རླབས་སྒྲའི་གཞས་སྣ་འཁྲབ་སྟོན་གྱི་མདོ་འཛིན་པའི་ལས་རིམ་གཙོ་སྐྱོང་ཐོག་གཞས་དང་ཞབས་བྲོ། བཀའ་སློབ་སྒྲོགས་སྦྱང་། སྙན་ངག་གྱེར་འདོན། མཇུག་ཏུ་ཕ་མའི་འཁྲབ་གཞས་དང་ས་གནས་ཀྱི་འཁྲབ་གཞས་བཅས་གཟིགས་འབུལ་ཞུས་རྗེས་རྒྱན་ཤོག་དཀྲུག་ནས་ཨང་དང་པོ་ནས་བརྒྱད་པ་བར་བརྔན་པ་འབུལ་རྗེས། བོད་ཀྱི་སྐོར་བྲོ་དང་དེང་རབས་ཞབས་བྲོ་བཅས་བཀྲ་ཤིས་བདེ་ལེགས་ངང་མཇུག་སྒྲིལ།
རྒྱབ་སྐྱོར་གནང་མཁན་ཡོངས་ལ་སྙིང་དབུས་ནས་བཀའ་དྲིན་དང་ཐུགས་རྗེ་ཆེ་ཞུ།
བྷེལ་ཇམ་བོད་ཀྱི་ཆོས་རིག་འཛིན་སྐྱོང་ཁང་གིས། ཕྱི་ལོ་ ༢༠༢༤།༡༠།༢༩ལ
