ཕྱི་ལོ་༢༠༢༥ ཟླ་ ༦ ཚེས་ ༨ རེས་གཟའ་ཉི་མའི་ཉིན་བྷེལ་ཇམ་བོད་ཀྱི་ཆོས་རིགས་འཛིན་སྐྱོང་ཁང་གི་གྷན་ཐྲུ་ས་གནས་འཇམ་དབྱངས་བློ་འཕེལ་སློབ་གྲྭར་སློབ་དུས་འདིའི་ཕ་མའི་ཚོགས་འདུ་ཐེངས་གཉིས་པ་དེ་འཚོགས། དེ་རིང་གི་འཚོགས་འདུའི་བརྗོད་གཞི་དང་པོ་ནི་ཁྱིམ་ཚང་གི་སློབ་གསོའི་ཐད་དགེ་རྒན་དང་ཕ་མ་གཉིས་མཉམ་རུབ་བྱས་ཏེ་སློབ་ཕྲུག་ཚོའི་བོད་སྐད་དང་བོད་ཡིག་ཡར་རྒྱས་གཏོང་བར་དམིགས་ནས་འཚོགས་པ་ཞིག་ཡིན།
བརྗོད་གཞི་གཉིས་པ་དེ་གྷན་ཐྲའི་ས་གནས་འགན་འཛིན་གསར་བ་བསྐོ་བཞག་བྱ་རྒྱུའི་ཆེད་དུ་ཡིན།
ས་གནས་འགན་འཛིན་ཟུར་པ་དཀོན་མཆོག་ལགས་ཁོང་སྒེར་གྱི་ལས་ཀའི་དཀའ་ངལ་ཞིག་གི་རྐྱེན་གྱིས་ལས་གནས་ནས་དགོངས་པ་ཞུ་དགོས་བྱུང་།
༢༠༡༦ ལོའི་ཟླ་༠༥ པའི་ཚེས་༠༨ ཉིན་ས་གནས་གྷན་ཐྲའི་སློབ་གྲྭ་བཙུགས་པ་ནས་བཟུང་ཁོང་གིས་ད་ལྟའི་བར་ལོ་ངོ་དགུ་ལྷག་གི་རིང་བོད་ཀྱི་སྐད་ཡིག་འཛིན་སྐྱོང་སྤེལ་གསུམ་ཐད་བྷེལ་ཇམ་བོད་ཀྱི་ཆོས་རིག་འཛིན་སྐྱོང་ཁང་ལ་ཕྱག་ལས་རྒྱུན་རིང་གནང་ཡོད་པས་ཆོས་རིག་འཛིན་སྐྱོང་ཁང་ནས་ཁོང་ལ་སྙིང་ཐག་པ་ནས་ཐུགས་རྗེ་ཞུ་བ་དང་ཆབས་ཅིག་ཁོང་གི་བཟའ་ཟླ་ཡིས་ལས་དོན་འདིའི་ཐད་རྒྱབ་སྐྱོར་དང་ཐུགས་འཁུར་གནང་བ་ལའང་སྙིང་ཐག་པ་ནས་བཀའ་དྲིན་ཆེ་ཞུས་བ་ཡིན།
སློབ་གྲྭ་འདི་ནི་ཐོག་མར་དགེ་རྒན་གཉིས་ཀྱིས་དང་བླངས་ཐོག་སློབ་མ་བརྒྱད་ལ་སློབ་ཁྲིད་བྱས་བ་ནས་འགོ་བཙུགས་ཡོད་པ་ཞིག་ཡིན་མོད། འོན་ཀྱང་། ད་ལྟ་སློབ་མ་ ༣༢ དང་དགེ་རྒན་བདུན་ཡོད་ལ་འཛིན་གྲྭའང་ཁག་མ་འདྲ་བ་དྲུག་ལ་བགོས་ཏེ་དགེ་རྒན་ཚོས་དང་བླངས་ཐོག་ནས་སློབ་ཁྲིད་བྱེད་མུས་སུ་ཡོད། ཡར་རྒྱས་ཀྱི་རྣམ་པ་འདི་དག་གཙོ་བོ་ཁོང་གི་སྐུ་ལས་བསྐྱོན་པ་ལ་བརྟེན་ནས་བྱུང་ཡོད།
དེ་རིང་འདིར་ཁོང་གི་ཚབ་ཏུ་ས་གནས་འགན་འཛིན་གསར་བ་འཇིགས་མེད་ཚེ་དབང་ལགས་བསྐོ་གཞག་བྱས་ཡོད། ས་གནས་འགན་འཛིན་གསར་བ་འཇིགས་མེད་ཚེ་དབང་ལགས་ནི་སྐབས་དང་པོ་ནས་ད་ལྟའི་བར་དུ་ཕ་མའི་ཚོགས་གཙོ་བྱས་མྱོང་ཡོད་ལ་ཁོང་དང་ཁོང་གི་བཟའ་ཟླ་གཉིས་ནི་བོད་ཀྱི་ཆོས་དང་རིག་གཞུང་ལ་དོ་སྣང་ཆེན་པོ་ཡོད་མཁན་ཞིག་དང་སེམས་ཤུགས་ཀྱིས་སློབ་གྲྭ་འདིར་ཕྱག་ལས་ཡུན་རིང་གནང་མཁན་ཞིག་ཡིན་པས་བྷེལ་ཇམ་བོད་ཀྱི་ཆོས་རིག་འཛིན་སྐྱོང་ཁང་ནས་ཁོང་ལ་གཉིས་་ལ་ཐུགས་རྗེ་ཆེ་ཞུ་བ་དང་ཆབས་ཅིག་ཁོང་བཀྲ་ཤིས་བདེ་ལེགས་ཞུ།
མཐའ་མར་ཕ་མའི་ཚོགས་གཙོ་གསར་དུ་འདེམས་པ་དང་བཅས་འཚོགས་འདུ་བདེ་ལེགས་ངང་མཇུག་བསྡུས།།
བྷེལ་ཇམ་བོད་ཀྱི་ཆོས་རིག་འཛིན་སྐྱོང་ཁང་ནས།
༢༠༢༥/༠༦/༠༨ ཉིན་སྤེལ།
