དེ་རིང་ཕྱི་ལོ་ ༢༠༢༥ ཟླ་ ༡༢ ཚེས་ ༢༧ ཉིན་བྷེལ་ཇམ་བོད་ཀྱི་ཆོས་རིག་འཛིན་སྐྱོང་ཁང་གིས་གོ་སྒྲིག་ཐོག བསླབ་དེབ་བསྐྱར་ཞིབ་ཀྱི་ཚོགས་འདུ་ཐེངས་དང་པོ་དེ་ཨན་ཐྲི་ཝེར་པེན་ས་གནས་འཇམ་དབྱངས་བློ་འཕེལ་སློབ་གྲྭར་འཚོགས་ཡོད། འདི་ནི་བྷེལ་ཇམ་བོད་ཀྱི་ཆོས་རིག་འཛིན་སྐྱོང་ཁང་གིས་ད་ལྟའི་བསླབ་གཞི་གཏན་འབེབ་བྱས་ཏེ་ལོ་ངོ་བདུན་འཁོར་བའི་རྗེས་ཀྱི། བསླབ་དེབ་ལ་བསྐྱར་ཞིབ་གནང་བའི་ལས་རིམ་གལ་ཆེན་ཞིག་ཆགས་ཀྱི་ཡོད།
ཚོགས་འདུའི་གནང་དོན།
ཐེངས་འདིའི་ཚོགས་འདུ་ནི་ཤེས་ཡོན་འགན་འཛིན་གྱིས་སྣེ་ཁྲིད་འོག རྩོམ་སྒྲིག་པ་རྣམས་དང་། འཛིན་གྲྭ་བརྒྱད་པའི་དགེ་རྒན་རྣམས་ཀྱིས་ལྷན་ཞུགས་གནང་ཡོད། ཚོགས་ཐོག་ཏུ་སློབ་དེབ་སྤྱི་ཡོངས་དང་། ལྷག་པར་དུ་འཛིན་གྲྭ་བརྒྱད་པའི་བསླབ་དེབ་ལ་ཞིབ་འཇུག་དང་བསྐྱར་ཞིབ་ནན་མོ་གནང་ཡོད།
བསླབ་གཞིའི་འགྱུར་ལྡོག་གཙོ་བོ།
ད་ལྟའི་ས་གནས་ཀྱི་བོད་རིགས་བྱིས་པ་ཚོའི་སྤྱི་ཚོགས་འཚོ་བའི་གནས་བབ་དང་། དུས་ཀྱི་དགོས་མཁོ་ལ་གཞིགས་ཏེ་གཤམ་གསལ་ལེགས་བཅོས་གནང་རྒྱུ་གཏན་འབེབ་བྱུང་ཡོད།
ནང་ཆོས་དང་རིག་ལམ། སྔར་ཟུར་ཁྲིད་ཀྱི་ཚུལ་དུ་ཡོད་པའི་ནང་ཆོས་དང་རིག་ལམ་གྱི་སློབ་ཚན་དེ་དག། ད་ལྟ་དངོས་སུ་རྩ་བའི་བསླབ་གཞིའི་ནང་བཅུག་སྟེ་གཏན་འབེབ་གནང་ཡོད།
ལྟ་གྲུབ་སློབ་གསོ། ལྟ་གྲུབ་དགེ་རྒན་རྣམས་ཀྱིས་སློབ་མའི་མི་ཚེའི་འཚོ་བ་དང་འབྲེལ་བའི་ལྟ་གྲུབ་ཀྱི་སློབ་གསོ་སྤྲོད་ཕྱོགས་ལ་བསྐྱར་ཞིབ་གནང་།
མ་འོངས་འཆར་གཞི། རིམ་པས་སྔོན་འགྲོའི་སློབ་དེབ་ལའང་དུས་བསྟུན་གྱིས་བསྐྱར་ཞིབ་དང་ལེགས་བཅོས་གང་དགོས་གནང་རྒྱུ་ཡིན་པ་རེད།
འདི་ནི་བྷེལ་ཇམ་ནང་གནས་སྡོད་བོད་རིགས་ན་གཞོན་ཚོའི་ཕ་མེས་ཀྱི་ཆོས་དང་རིག་གཞུང་གི་རྨང་གཞི་བརྟན་པོ་ཚུགས་ཐབས་དང་། དེང་རབས་ཀྱི་ཤེས་ཡོན་གནས་བབ་དང་མཐུན་ཐབས་བྱེད་པའི་གོམ་པ་གལ་ཆེན་ཞིག་ལ་ངོས་འཛིན་བྱེད་བཞིན་ཡོད།
