དེ་རིང་ཕྱི་ལོ་༢༠༢༥ ཟླ་༡ པོའི་ཚེས་༥ ཉིན། བྷེལ་ཇམ་བོད་ཀྱི་ཆོས་རིག་འཛིན་འཛིན་སྐྱོང་ཁང་གི་༢༠༢༥ ལོའི་རྒྱུན་ལས་ལྷན་ཚོགས་དེ་བཞིན་ས་གནས་སྦུ་རོའུ་རྗེ་འཇམ་དབྱངས་བློ་འཕེལ་སློབ་གྲྭ་རུ་ཚོགས་པ་དང་། ཚོགས་འདུའི་སྟེང་སྤྱི་ཁྱབ་འགན་འཛིན་འཇིགས་མེད་ལགས་ནས་རྒྱུན་ལས་ལྷན་ཚོགས་ཀྱི་ངོ་བོ་དང་འགན་དབང་། ཚོགས་པའི་ངོས་ནས་ལག་བསྟར་དགོས་བའི་བྱེད་སྒོ་ཁག་ངོ་སྤྲོད་དང་དྲན་བསྐུལ་གནང་བ་དང་། ཤེས་ཡོན་འགན་འཛིན་ལས་ཚབ་རྒན་ལྷག་པ་ཚེ་རིང་ལགས་ནས་ཤེས་ཡོན་དང་འབྲེལ་བའི་ལས་བསྡོམས་སྙན་གསེང་ཞུས་བ་དང་། དམིགས་བསལ་ས་གནས་ཁག་དྲུག་གི་འཇམ་དབྱངས་བློ་འཕེལ་སློབ་གྲྭར་བསྐོར་བསྐྱོད་ཀྱི་ལས་དོན་ངོ་སྤྲོད་དང་བཅས་ལེགས་སྤེལ་ཉེས་འགོག་གི་དགོངས་ཚུལ་ཁག་ཅིག་གསུངས་སོང་།
དེའི་རྗེས་སྤྱི་ཁྱབ་འགན་འཛིན་དང་ཤེས་ཡོན་འགན་འཛིན་ལས་ཚབ། དྲུང་ཆེ། ས་གནས་ཁག་གི་འགན་འཛིན་དང་ལས་བྱེད་བཅས་རྒྱུན་ལས་རྣམས་ཀྱིས་འཇམ་དབྱངས་བློ་འཕེལ་སློབ་གྲྭའི་ཤེས་ཡོན་ཡར་རྒྱས་གཏོང་ཕྱོགས་ཀྱི་གྲོས་གཞི་ཁག་སྟེ་སློབ་དེབ་དང་ནང་ལས། ཐ་སྙད་སྐོར། དག་ཡིག རྒྱུགས་ཤོག རིག་ལམ། ཚགས་པར། དཔེ་ཁྲིད་རྩེད་ཆས། དབྱར་གསེང་བོད་ཀྱི་རིག་གཞུང་ཟབ་སྦྱོང་། མཐར་ཕྱིན་སློབ་མའི་ཤེས་ཡོན་མཉམ་གསོག་སོགས་ཀྱི་སྐོར་ལ་གྲོས་བསྡུར་ལྷུག་པོ་གནང་སྟེ། མཇུག་མཐར་སྔོན་འགྲོ་དང་པོ་ནས་གསུམ་པ་བར་གྱི་སློབ་དེབ་བསྒྱུར་བཅོས་གཏན་འབེབས་དང་། མཐར་ཕྱིན་སློབ་མ་ཚོ་རྒྱ་གར་དུ་ཤེས་ཡོན་མཉམ་གསོག་ཟབ་སྦྱོང་འཁྲིད་རྒྱུ་གཏན་འབེབས་བཅས་གྲོས་ཆོད་ཁག་ཅིག་བཞག་སྟེ་ཚོགས་འདུ་བདེ་ལེགས་ངང་གྲོལ།།
