ཕྱི་ལོ་ ༢༠༢༥ ཟླ་༦ པའི་ཚེས་༡༤ཉིན། བྷེལ་ཇམ་བོད་ཀྱི་ཆོས་རིག་འཛིན་སྐྱོང་ཁང་གི་ཕྱི་ལོ་༢༠༢༥ ལོའི་འགན་འཛིན་ལྷན་ཚོགས་དེ་བཞིན་གྲོང་ཁྱེར་ཨན་ཐྲུ་ཝར་ཕན་དུ་འཚོགས་ཡོད་པ་དང་། ལྷན་ཚོགས་ཐོག་བྷེལ་ཇམ་བོད་ཀྱི་ཆོས་རིག་འཛིན་སྐྱོང་ཁང་གི་སློབ་སྟོན་པ་དང་སྤྱི་ཁྱབ་འགན་འཛིན་གཙོས་ས་གནས་ཁག་དྲུག་གི་འཇམ་དབྱངས་བློ་འཕེལ་སློབ་གྲྭའི་འགན་འཛིན་དང་དགེ་རྒན་སྐུ་ཚབ། ཕ་མའི་ཚོགས་གཙོ་གཞོན་བཅས་ཁྱོན་མི་གྲངས་བཞི་བཅུ་ལྷག་མཉམ་ཞུགས་བྱས་ཡོད་པ་དང་། ཆོས་རིག་འཛིན་སྐྱོང་ཁང་གི་དྲུང་ཆེ་ལགས་ཀྱིས་ལས་རིམ་གཙོ་སྐྱོང་ཐོག་མར་སྤྱི་ཁྱབ་འགན་འཛིན་ལགས་ཀྱིས་འགན་འཛིན་ལྷན་ཚོགས་ཀྱི་གྲུབ་ཆ་དང་དབང་ཚད། ཕྱི་ལོ་༢༠༠༨ ལོ་ནས་༢༠༢༥ ལོའི་བར་གྱི་བྷེལ་ཇམ་བོད་ཀྱི་ཆོས་རིག་འཛིན་སྐྱོང་ཁང་གི་གྲུབ་འབྲས་ཆེ་ཁག་དང་མ་འོངས་པའི་ལས་གཞི་ཁག་ཅིག་བཅས་ངོ་སྤྲོད་གནང་། སྤྱི་ཁྱབ་འགན་འཛིན་འཇིགས་མེད་ལགས་ནས་སྤྱི་ཁྱབ་རྩིས་པ་བསྟན་འཛིན་ལགས་ཀྱི་ཚབ་བྱས་ཏེ་ཚོགས་པའི་བྱུང་སོང་ལྷག་གསུམ་གྱི་རྩིས་ཁྲ་སྒྲོགས་སྦྱང་གནང་། ས་གནས་ཁག་དྲུག་གི་འཇམ་དབྱངས་བློ་འཕེལ་སློབ་གྲྭའི་འགན་འཛིན་རྣམ་པས་ས་གནས་སོ་སོའི་ལས་བསྡོམས་དང་རྩིས་ཁྲ་སྒྲོགས་སྦྱང་གནང་བ་དང་། ས་གནས་ཁག་དྲུག་གི་དགེ་རྒན་གྱི་འཐུས་ཚབ་དང་ཕ་མའི་ཚོགས་གཙོ་གཞོན་རྣམ་པས་ས་གནས་ཁག་གི་དགེ་རྒན་དང་ཕ་མའི་བསམ་ཚུལ་ཅི་ཡོད་སྙན་གསེང་ཞུས། ཆོས་རིག་འཛིན་སྐྱོང་ཁང་གི་སློབ་སྟོན་པ་བློ་བཟང་དབང་འདུས་ལགས་དང་ལྷག་པ་ཚེ་རིང་ལགས་གཉིས་ཀྱིས་ལམ་སྟོན་གསུང་བཤད་གནང་། དེའི་རྗེས་ཤེས་ཡོན་འགན་འཛིན་ལས་ཚབ་རྒན་ལྷག་པ་ཚེ་རིང་ལགས་ནས་སློབ་ཕྲུག་ཚོར་སློབ་དེབ་ཁག་སྒྲ་བརྙན་ཟུང་འབྲེལ་ཐོག་བཟོ་རྒྱུ། ཚོགས་པའི་དཔལ་འབྱོར་འདུ་འགོད་ཆེད་གྲོང་ཁྱེར་ཨན་ཐྲུ་ཝར་ཕན་དུ་བོད་ཀྱི་དུས་སྟོན་ཞིག་གོ་སྒྲིག་ཞུ་རྒྱུ། བྷེལ་ཇམ་བོད་ཀྱི་ཆོས་རིག་འཛིན་སྐྱོང་ཁང་གི་མ་འོངས་ལས་དོན་བྱེད་ཕྱོགས་ཐད་ཁྱིམ་ཚང་སློབ་གསོ་དང་རྒྱུགས་ཤོག་ལོ་གཉིས་རེ་ནས་འགྱུར་བ་གཏོང་རྒྱུ། ལོ་རེ་ཉུང་མཐར་དགེ་རྒན་ལྷན་ཚོགས་ཐེངས་གཅིག་འཚོག་དགོས་བ། སྔོན་འགྲོའི་འཛིན་གྲྭའི་སློབ་ཕྲུག་ཚོར་སློབ་ཁྲིད་རྩེད་ཆས་བཟོ་རྒྱུ། ཚོགས་ཞུགས་པ་ཡོངས་ཀྱིས་སྤྱིའི་འགན་འཛིན་གཞོན་པ་རྡོ་རྗེ་སྐྱབས་དང་ཤེས་ཡོན་འགན་འཛིན་བཀྲ་ཤིས་བདེ་ལེགས། རྩིས་པའི་ལས་རོགས་བསྟན་འཛིན་བདེ་ཆེན་ལགས་དང། འབྲེལ་མཐུད་པ་བསྟན་འཛིན་ཆོས་དབྱིངས་ལགས་བཅས་རྒྱུན་ལས་གསར་བ་ཁག་ཅིག་སྤྱི་མོས་བསྐོ་བཞག་དང། གྲོས་ཆོད་གཏན་འབེབས་གནང་སྟེ་༢༠༢༥ ལོའི་འགན་འཛིན་ལྷན་ཚོགས་བདེ་ལེགས་ངང་གྲོལ།
